Сурок посёлкышто чер деч колышо салтак- влаклан воин мемориалым чоҥаш тӱҥалыт
Медведево районышто Сеҥымашын 75-ше идалыкше вашеш сӧй пасуэш сусыргымылан кӧра госпитальыште ӱмыр лугыч лийше- влаклан мемориалым чоҥат. Кугу Ачамланде сарыште сеҥыме кечылан ямдылалтме йодышым Республикым вуйлатыше уэш черетдыме совещанийыште каҥашен. Тиддеч ончыч тудо оргкомитетын заседанийыштыже Сурок посёлкышто чер деч колышо салтак- влаклан воин мемориалым чоҥаш тӱҥалаш кӱштен ыле. Медведево район администрацийым вуйлатыше Денис Окулов увертарен: мемориал комплекслан 400 квадрат метр кумдыкым ойырымо, проектно-смета документацийым ямдылыме. Вер у, сандене корным ышташ кӱлеш. Тӱҥалтыш пашан акше ик миллион наре теҥге. Чоҥымо графикым ыштыме. Пашам кызыт тарватыман. Молан манаш гын, теле жапыште негызше пеҥгыдем шушаш. Мартыште кермычым опташ тӱналман. Декабрьыште гранит плита- влакым ямдылыман. Апрельыште комплекс кундемым тӱзландараш тӱҥалаш лиеш. Главан мутшо почеш, фундамент пашан технологий процессшым тӱрыс шуктыман. Тыгак тудо гранит плиташ возышаш лӱм- влакым ямдылыше ответственный структура лийшаш манын каласен. Тыште йоҥылышым колташ ок лий. Пален налме у лӱм- влаклан верым кодыман, палемден тудо. Тыгак машинам шогалтыме вер, асфальтым шарыме, электротулым да видеоэскерымашым пуртымо шотышто темлымаш- влак лийыныт. Варарак комплекс кундемыште Курымашлык тулым ыштыме нергенат ойлымо. Совещанийым мучашлышыла Александр Евстифеев ушештарен: каныш кечылаште верыш лектын, раш мутланымаш лиеш.