Медведево районышто мемориал комплекс-влак чоҥалтыт

Александр Евстифеев, сӧрымыж семынак, Медведево районышто чоҥалтше мемориал- влакым ончен лектын. Сурок посёлкышто Кугу Ачамланде сар годым госпитальлаште ӱмыр лугыч лийше салтак- влакым тойымо верыште шарнымаш верым чоҥаш палемдыме. Пашазе- влак сомылым тӱналыныт. Игечым шотыш налын, негызшым ыштыме годым посна технологийым кучылтыт. Мемориал комплекслан 440 квадрат метр кумдык верым ойырымо. Тудо у верыште нӧлталтеш. Сандене корным ыштыман, машинам шогалтыме вер лийшаш, электротулым пуртыман да видеоэскерыме системым келыштарыман. Тачысе кечылан Йошкар Армийын ӱмыр лугыч лийше 555 салтакше нерген увер уло. Тудым эше рашемдаш кӱлеш. Александр Евстифеев тыгак тений Кыдалаш Озакъялыште верысе калыкын тӱналтышыж почеш чоҥымо мемориал комплексым ончен. Тушто изирак чапкӱ гына лийын. Ынде сарыште лийше 599 еҥын лӱмжым возыман мемориал пырдыжым ешарыме. Кундемыштыже брусчаткым, асфальтым шарыме, теҥгыл ден урно- влакым вераҥдыме, кушкылым да пеледышым шындыме. Кундемысе 11 ял гыч 599 еҥ сарыш каен. Тушечын 375-ше пӧртылын. Чылаштынат лӱмыштым мемориал пырдыжеш возымо. Шушаш ий лӱмгече идалык лиеш. Кугу сеҥымашлан 75 ий темеш да 20-шо ийым Шарнымаш да Чап идалык семын увертарыме. Озакъялыште мемориал комплекс ыштен шукталтын манаш лиеш. Сурокышто пашам шуйымо лиеш. Кӧ сӧй пасушто кредалын, пӧртылын але уке, - чылам шарныман да шарнымашеш кодыман. Тиде мемнан порысна,- каласен Александр Евстифеев.