Коронавирус ваштареш шогышо оперативный штабын заседанийже лийын
Коронавирус ваштареш шогышо оперативный штабын заседанийыштыже Республикым вуйлатыше вуйын шогышо- влаклан противоэпидемиологий мерым шуктымым пеҥгыдын терген шогаш кӱштен. Пытартыш жапыште Ковид-19 чер дене черланымаш ешаралташ тӱҥалын. Маске режимым эскерыдымылан кӧра, чер кушмаш ок чарне гын, чарымаш- влакым уэш пуртена. Вес семын ок лий. Молан манаш гын, тиде калыкын тазалыкше да илышыже дене кылдалтын,- каласен Александр Евстифеев. Роспотребнадзор виктемым вуйлатыше Светлана Булатова палемден: туныктымо процесс кызыт ласкан кая, чер шарлымым палемдыме огыл. Тазалыкаралтыш министр Марина Панькован мутшо почеш медицина полышым пуаш 7 медицина организацийыште 560 койкым шындыме. Инфекций стационарлаште 419 еҥ эмлалтеш, вашкеполыш станцийыш йыҥгыртымаш ешаралтын. ОРВИ дене 31 процентлан, пневмоний дене 37 процентлан шукырак йыҥгыртат. Марий Элыште 90 ИВЛ аппарат уло, лишыл жапыште эше 40 аппаратым кондышаш улыт. Республикым вуйлатыше калыкым коронавируслан шукырак тестироватлаш ешартыш пашаверым ышташ да эмлаш, аралаш мом налаш кӱмӧ нерген отчётым ышташ кӱштен.