Элна мучко телефон да интернет гоч ыштыме осал паша шукем толеш
Тений пел ий жапыште республикыштына ныл тӱжем осал пашам ыштыме. Кодшо кечын коллегийын кумдаҥдыме заседанийже лийын. Тушто пелийысе оперативно-служебный пашам иктешлыме. Пел ийыште наркотик дене, саркурал дене закондымын пайдаланыме шотышто осал пашам, керылт пурымашым, пачер гыч шолыштмашым, уремыште ыштыме преступленийым шагалрак регистрироватлыме. Тидын годымак Россий мучко да республикыштат телефон да интернет гоч оксам шолыштмо да наркотикым шаркалыме паша шукем толеш. Нуно ик кумшо ужашлан ешаралтыныт. Республикыште кажне визымше осал пашаже лач нунын дене кылдалтын- 676. Осал пашам почмаш 62 наре процентыш шуын. Тидыже- кок тӱжемат 180 утла осал паша. Тушечын вичшӱдӧ нарыже поснак неле осал паша. Кугу вийым калыклан лӱдыкшым лукшо пашам почмашке виктарыме. Пуштмашым, керылт пурымашым чыла пален налме, тазалыклан лӱмын эҥгекым ыштымашым 96 процентым, толымашым- 82, пачер гыч шолыштмашым 68 процентым почмо. Тыгак ончычсо ийлаште ыштыме 106 осал пашам рашемден кертме. Тыгак тений икымше пелийыште 373 корно происшествий лийын. Тушто 37 еҥ колен, 500 утла еҥ эмагенен. Йӱшӧ вуя руль воктеке шичше тӱжемат 120 еҥым кучымо.