Тошто пӧртым кораҥдыме деч пайдам налаш лиеш

Общероссийский калык фронтын экспертше-влак тошто да илаш йӧрыдымӧ пӧрт- влакым кораҥдыме годым «ушан» технологийым кучылташ темлат. Тидыже пӧртым рончымо годым калыклан йӧндымылыкым огеш лук, материалын шуко ужашыжым уэш кучылташ йӧным пуа. Тыгай темлымашым ОНФ-ын еҥже- влак Российысе чоҥымаш министрествыш колтат. Тошто пӧртла гыч калыкым кусарыме программым кузе шыҥдарымым тергыме годым «фронтын» еҥже- влак тошто пӧртын шӱкшакшым кораҥдыме йодыш дене ваш тӱкненыт. Тиде куштыра шуко жап верыштак кия. Тыгай сӱрет ятыр кундемыште вашлиялтеш. Южо вере тудым йӱлалташ толашат. Тыгай  проблеме молан лектын: муниципалитетыште тошто пӧртым кораҥдыме пашалан оксам ойыраш верысе бюджетыште ончылгоч палемдыме огыл. Сандене тидым шотыш налаш кӱлеш. У концепций лӱдыкшыдымылыкым, экологий яндарлыкым да материалым уэш кучылтмым шукташ йодеш. Подрядчик пӧртым рончымо годым кундемым шӱкшак деч тичмаш эрыктен кода  гын веле, тошто материалым налын кертеш. Тыге ышташ гын, бюджет гыч ик ыр оксат ок кучылталт.  Тошто матераилын ик ужашыже чоҥымаште, весыже- корным ыштымаште, корем ден лакылам петырымаште кучылталт кертеш, кӱртньым уэш левыкташ колтат, кумшыжым йоҥыштен, ӱяҥдышлан кучылташ лиеш. Тыге нуным тораш наҥгайыде, шӱк орам чумырыде, пайдам кондаш лиеш. «Ушан» технологийым  Россий минстройын «Ушан ола» проектше гоч кучылташ лиеш,- ойлат темлыше-влак.