Волжск олаште азам ыштыме пӧртым шушаш ийын августлан ыштен шуктышаш улыт
Республикым вуйлатыше Волжск олаште азам ыштыме пӧртым чоҥымо жапым шуктымым терген да олам социал-экономик велым вияҥдыме йодыш дене совещанийым эртарен. Паша дене мийыме кышкарыште Александр Евстифеев ончыкыжым азам ыштыме пӧрт лийшаш верыш миен да чоҥышо организацийын еҥышт дене чоҥымо срокым шуктымо йодышым каҥашен. Аза пӧртым тений январьыште ышташ тӱҥалме. Тудым шушаш ийын августлан ыштен шуктышаш улыт. Акше 450 миллион теҥгеш шуэш. Таче кечылан канализацийын тӱжвал сетьшым келыштарыме, шокшым пуышо сетьым монтироватлыме. Кызыт икымше ден кокымшо пачаш нӧлталтеш. Икымше ноябрь марте зданийыш шокшым пуышаш улыт. Сетьыште пашам ыштыме годым лекше нелылык график деч изиш кучалташ амалым пуэн. Сандене республикым вуйлатыше чоҥымо темпым кугемдаш кӱлеш манын. Олам социал-экономик велым вияҥдыме йодыш дене совещанийыште Глава палемден: олалан бюджет гыч 50 миллион теҥгем ойырымо, пелыжым- правительствын резерв фондшо гыч. Оксам эн кӱлешан паша- влакым шукташ пуымо. Корно паша нерген ойлымо годым олан мэрже Евгений Лебедев палемден: корно- влакын кумшо ужашышт кызыт олмыкталтеш, пытартыш ужашыже 30-шо сентябрьлан мучашлалтшаш. Совещанийыш погынышо- влак тыгак илаш йӧрыдымӧ пӧртла гыч калыкым кусарыме, оласе тӱжвал сетьым кучылтмо нергенат ойленыт. Азам ыштыме пӧртым чоҥымо деч посна калыкым кусараш пӧртым чоҥымо йодыш пӱсын шога,- каласен республикым вуйлатыше. Тыгай пӧртлан эше ик площадке уло. Но тудын юридический статусшым рашемдыман. Калыкым кусарымаш- тиде пӱсын шогышо йодыш, каласен Александр Евстифеев да социал кӱлешан объект- влакым чоҥымо йодышым вуйлатыше- влаклан контрольыш налаш кӱштен.