Волжский районым вияҥдыме йодышым каҥашыме
Правительстве пӧртыштӧ Волжский районым социал- экономик велым вияҥдыме йодышым каҥашыме. Марий Элым вуйлатыше Александр Евстифеев Волжский район администрацийым вуйлатыше дене пашаче вашлиймашым эртарен. Нуно районысо школ- влакым у тунемме ийлан ямдылыме нерген мутланеныт. Тиддеч посна шушаш олтымо тургымлан ямдылалтме да калыклан йӱшаш вӱдым ситарыме йодышым каҥашыме. Район администрацийым вуйлатыше Татьяна Ильина Черкысола ден Пӧтъял яллаште, Памар ден Купсола илемласе вӱдзаборлаште аварий ситуацийым кораҥдаш полшымылан Александр Евстифеевлан тауштен ойлен. Районлан тунам 12 миллион теҥгем ойырымо ыле. Кызыт чыла верыштыжат вӱдым ситарыме паша мучашыш лишемеш. Школ- влакым у тунемме ийлан ямдылыме шотышто Татьяна Ильина палемден: икымше сентябрьыште 10 школ шке пашажым тӱҥалеш. Чыла школлан приёмкым эртарыме. Парт коклаш кок тӱжемат 400 тунемше шинчеш. Шарача школышто естественно-научный да технологий корно дене «Точка роста» рӱдер почылтеш. Памар, Пӧтъял да Обшияр школлаште информатизаций шотышто материально-технический база уэмдалтеш. Кугу Корамас школ кугу скоростян интернет деке ушалтеш. Изи класслаште тунемше- влакым шокшо кочкыш дене пукшаш районлан кок миллион теҥге оксам ойырымо. Шийвундым технологий оборудованийым, инвентарьым да атышӧрым налаш колтымо. Икымше сентябрь марте районысо 98 процент туныктышо вакцинацийым ыштышаш. Олтымо тургымым район шке жапыштыже тӱҥалшаш.