Вич у троллейбусым налаш республикын йодмашыжым сайлан шотлымо

           Вич у троллейбусым налаш республикын йодмашыжым сайлан шотлымо. Тидлан 133 миллион утла теҥге льготан займ пуалтеш. Россий Правительстве председательын алмаштышыже Марат Хуснуллинын видео конференцкыл йӧн дене эртарыме заседанийыште бюджет кредитым налаш йодмашым очымо нерген декладым республикым вуйлатышын сомылжым шуктышо Юрий Зайцев ыштен. Троллейбусым налаш сайлан шотлымо йодмашым илышыш шыҥдарымаш республикылан ешарен кум миллиард теҥге частный инвестицийым кондаш йӧным пуа. А эн тӱҥжӧ «Ширяйково» микрорайоныш транспортым колташ йӧным ышта. Пале: 2023-шо ийыште Сомбатхей ден Ширяйковом ушышо магистраль чоҥен шукталтеш. У транспорт схема почеш Ширяйково марте транспорт колталтшаш. А тидлан визыт деч шагал огыл у троллейбус кӱлеш лиеш. Тений чылаже республикыштына инфраструктуро бюджет кредитым кучылтын кум проект шыҥдаралтеш. Республикыш 645 миллион теҥге толын. Тушечын тымарте 505 миллионжым кучылтмо.
             Фото: Марий Элым вуйлатышын организаций да аналитик виктемже.