Вӱдшор дене кылдалтше ученийыште Мариэнерго моштымашыжым ончыктен

                     Республикысе вӱдшор дене кылдалтше ученийыште Мариэнерго моштымашыжым ончыктен. Тунеммаш Курык марий районышто эртен. Тренировкышто «МРСК» филиалын штабшын верласе кучем органла дене пырля аварийым кораҥдыме пашаштым ончыктеныт. Тушто район администраций вуйлатыше Наталья Арганякова, Козьмодемьянск олан мэрже Михаил Козлов, МЧС-ын, Ростехнадзорын, граждан оборона комитетын еҥышт, «Энергия» акционер ушемын бригадыже лийыныт. Ученийыште тыгай задачым шындыме: пуйто вӱд чот шарлымылан кӧра юж линий вӱд кумдыкыш логалын, меҥгын негызшым вӱд мушкаш тӱҥалын, икмыняр меҥге сӱмырлен, кок подстанций тул деч посна кодын, 62 ялыште  шым тӱжем утла еҥ, кум школ да вич йоча сад тул деч посна кодыныт. Тунеммаште писылыкым, полыш вийым вашке кондымым, эҥгек лийме адрес- влакым вашке чумырымым онченыт. Ученийыште лийше еҥ- влакын сомылышытым сай манын аклыме. Тыгай тунеммаш чынак эҥгек лийме годым кугун полша. Шошо вӱдшор жаплан Мариэнерго ремонт бригадым, спец техникым, пушым, кылым ыштыме йӧным ончылгоч ямдылен.
Фото:  https://www.marpravda.ru/