Прививкым ышташ ешартыш пункт- влакым почмо

                            Коронавирус деч вакцинацийым ыштыме ӧрдыжсӧ пункт- влакым почмо. Республикыш 30-шо мартлан шотлымаште чылаже 30 тӱжемат 792 дозо Спутник- V вакциным кондымо да поликлиникылаш колтымо. Прививкым 21 тӱжемат 900 утла еҥ ыштыктен. Прививке кампанийым писештарен колташ манын, Йошкар-Олаште пункт- влак почылтыт. Мутлан, Сеҥымашын 30-шо идалыкше лӱмеш тӱвыра полатыште икымше да кокымшо поликлиникын бригадыже пашам ышта. Икымше поликлиникын специалистше- влак таче, 1,2, 5,6,7,8-ше апрельыште 10 гыч 15 шагат марте калыкым вучат. 12,13,14, 19,20,26,28-ше апрельыште кокымшо поликлиникын медицина пашаеҥже- влак вакцинацийым эртарат. Тӱвыра полатыш Макдональдс велым пурыман. Лишыл кечылаште Ленин лӱмеш тӱвыра полатыштат икымше медсанчастьын поликлиникыже пунктым почеш. Арня мучаш марте эше ик тӱшка вакциным кондышаш улыт.