Йоча- влакын кеҥеж канышыштым каҥашыме

                         Йоча- влакын каныме да тазалыкыштым пеҥгыдемдыме пашам виктарен колтымо йодышым ведомство-влак кокласе комиссийын заседанийыштыже ончымо. Марий Эл Правительстве председательын икымше алмаштышыже Михаил Васютин тиде комиссийын тенийсе икымше заседанийжым эртарен. Кеҥежымсе тазалыкым пеҥгыдемдыме кампанийлан ямдылалтме нерген Роспотребнадзор виктемым вуйлатыше Светлана Булатова ойлен. Тудын мутшо почеш, тенийсе тургымышто каныме да тазаҥдыме 184 организаций почылтшаш. Тушто 15 тӱжемат 400 утла йоча канен кертеш.  Чыла тӧнежланат план заданийым пуымо. Кызыт кочкыш сатум ситарыше- влакын реестрышт ышталтеш. Тӱжемат вич еҥ аттестацийым эртышаш.  Стационар лагерь- влакын кумдыкыштышт пудий, коля деч обработкым ыштат, воктелсе чодырам эрыктат. Шке балансыштышт йоча- влакын тазалыкыштым пеҥгыдемдыше тӧнежым кучышо предприятий ден организацийлам вуйлатыше- влак лагерьын пашам тӱҥалме жапше нерген Роспотребнадзор виктемыш увертарышаш улыт.