Шӱк-куштырам ойыркалыме комплекс- влакым ыштат

                     Республикыштына пеҥгыде шӱк-куштырам ойыркалыме шотышто объект- влакым пашаш колташ шонат. «Пеҥгыде шӱк-куштыра дене ыштыме комплексный системе» регионысо проектым шыҥдарыме радамыште «Экологий» калыкле проектын показательышкыже шуаш манын, республикыште икмыняр объектым ышташ палемдыме. Ойыркалыме пункт- влак Йошкар-Олаште 2022-2023-шо ийыште, Шернур районышто 2021-ше-22-шо, Курык марий районышто тений, Морко районышто 2023-шо 2024-ше ийлаште ышталтшаш улыт. Тӱшка куатше талукышто 150 тӱжем тонн. Регионысо операторын пашам ыштыме лектышыже почеш Морко посёлко воктене ышташ кӱлешлыкше уке манын палемдыме. Тушто шӱкшак шагал погына. Тудын олмеш комплексым Волжскышто ышташ темлыме. Тыгай комплекс- влак бюджет окса кӱшеш огыл, а посна инвестиций кӱшеш чоҥалтшаш улыт. Пӱртӱс поянлык министерстве инвестор- влакым кычалме шотышто пашам эртарен. Тачысе кечылан Марий Эл правительство ден ончыкылык инвестор коклаште соглашенийын проектшым ямдылыме. Тудын почеш Йошкар-Олаште, Шернур да Волжский районлаште 2024-ше ий марте кум ойыркалыше комплекс чоҥалтшаш. Курык марий районышто тений Кадышево ял воктене улшо полигонышто комплексым пашаш колташ палемдыме.