«Пӧлеклыме кечыш» ушнаш лиеш
Евсеев лӱмеш тоштер «Пӧлеклыме кечым» эртара. Икымше февральыште этнограф да тоштерым негызлыше Тимофей Евсеевын шочмо кечынже калыкле тоштерыште поро йӱлаш савырныше «Пӧлеклыме кече» акций лиеш. Ешыште аралалтше тошто ӱзгар- влак: фотосӱрет дене портрет, фарфор ден мебель, книга ден документ, парйем вургем ден сурт-коклаште кучылтмо ӱзгар, эртыше курымысо моло наста тоштерыш логалмек, мемнан историйнан да тӱвыранан ужашышкыже савырнат, озашт да илыш йӱлашт нерген каласкалат, моло тукымлан шарнымашеш кодыт. Пӧлеклыше кажне еҥ тоштерын площадкылашкыже кок еҥлан мияш ӱжмашым налеш,- увертара тоштер.
