Медицина колледжын театр студийже наградым сулен налын

                 Йошкар-Оласе медицина колледжын театр студийже награде дене палемдалтын. Колледжын туныктышо ден студент коллективше «Созвучие сердец» сымыктыш ден усталыкын тӱнямбал фестиваль конкурсыштышт кумшо степенян диплом дене палемдалтын. Сеҥымашыш тудо «Театр усталык» номинацийыште шуын. Колледжыште театр студий 2013-шо ий голдсек пашам ышта. Сценыште туныктышо да студент- влак модыт, а режиссёр-постановщикышт семын директорын алмаштышыже Ольга Козлова тырша. Кажне ийын нуно у спектакльым руш классикын произведенийже негызеш шындат. У пашам колледжыште ончыктымек, постановкышт дене Республикысе йоча клинический, психиатрический эмлыме верыште, Республикысе книгагудышто, Строитель техникумышто, Технологий колледжыште, Художественный училищыште да моло вереат миен савырнат. Тунемме программе неле гынат, репетиций да спектакльлан жапым муашак тыршат.
             (Театр студийын фотожо)