Марий Элыште ял ден муниципал образованийлан электрон «Шарнымаш книгаштым» чумырымо паша мучашлалтын

                Марий Элыште  ял ден муниципал образованийлан электрон «Шарнымаш книгаштым» чумырымо паша мучашлалтын,- увертарен редакций советын заседанийыштыже Правительство вуйлатышын алмаштышыже, тӱвыра министр Константин Иванов. Шушаш ийын  Кугу Сеҥымашлан 80 ий темме вашеш Президент Владимир Путин 2021-ше ийыште ял ден муниципал образованийлан электрон шарнымаш Книгаштым ышташ кӱштен ыле. Кӱштымашым шукташлан паша кум ий ышталтын. Теве икымыше мартыште материалым чумырен пытарыме.- каласен правительствым вуйлатышын алмаштышыже. Министерствын архив паша шотышто пӧлкажым вуйлатыше Любовь Кадочникован мутшо почеш кок тӱжемат 150 илем шотышто материалым чумырымо, Кугу Ачамланде сарыште лийше 129 тӱжемат 459 еҥ нерген уверым пуртымо, 27 тӱжем утла документым погымо. Материалым палемдыме жапыште Россий оборона министерствыш колтымо. Константин Иванов республикысе цифре министерствылан «Шарнымаш книган» республикысе электрон ресурсшым ышташ темлен. Чолган да чаткан пашам ыштымылан тӱвыра министрын тауштымашыже дене Йошкар-Олан, Волжскын, Куженер, Медведево, У Торъял, Советский районлан редакций советышт палемдалтыныт.
             Фото: Тӱвыра министерстве.