Марий Элыште кум эн сайын лудшым ойырат

             Марий Элыште кум эн сайын лудшым ойырат. Нуныжо «Артекыш» каят. Шушаш шумтакечын Йоча да самырык- влакын усталык полатыштышт самырык лудшо- влакын «Илыше классике» Россий кӱкшытан конкурсын регионысо йыжыҥже лиеш. Тудын лектышыже почеш кум сеҥыше «Артекыш» элысе кугу сылнымут конкурсын финалышкыже республикын чапшым аралаш каят. Путёвко верч Марий Элысе 10-17 ияш 40 эн сай лудшо кучедалаш тӱҥалыт. Тымарте нуно икмыняр йыжыҥым классыште, школышто, районышто, шке олаште эртеныт. Ынде нуно мастарлыкыштым профессионал- влак ончылно ончыктат. Эксперт- влак текстым сайын палымыштым, дикцийыштым, произведенийым кузе умылен чонышт гоч колтымыштым, авторын пыштыме шонымаш ден кумылжым почын пуымыштым аклат. Жюрим сымыстараш манын нунылан улыжат 4 минут гына пуалтеш. Конкурс кок номинаций дене эрта: проза произведенийын ужашыжым руш йылме дене да марла лудмаш дене.
          Фото: Архив.