Козьмодемьянск трактым кугу ачалыме паша вуча

Марий Элын вуйлатышыже Александр Евстифеев Козьмодемьянск трактыште корно могай улмым тергаш миен коштын. Тудым кугу ачалыме паша вуча. Трассым федерал собственностьышко кусарат. Корным аклаш Федерал корно агентствын Волго-Вятский регионысо автомобиль корно-влак федерал управленийжын вуйлатышыже  Илдар Мингазов толын.Козьмодемьянск трактым федерал корно-влак радамышке пуртымо шотышто йодышым каҥашымаш эше 2008-ше ийыштак тӱҥалын. 12 ий эртымеке гына шонымашке шумо. Тыге республикысе корно озанлык фондысо оксам ятырлан аныклен кодаш лиеш. А ачалаш корным кызытак кӱлеш. Тушто асфальт пеш уда, тыгак аварий чӱчкыдын лиеда. Федерал окса кӱшеш кугу ачалыме пашам шушаш ийыште тӱҥалаш палемдыме. А тений корнысо лаке-влакым шке вий дене петыраш тӱҥалыт.