Йошкар-Олаште автомашина-влак йӱлат

Пытартыш жапыште республикыште автомашина-влак чӱчкыдын йӱлат. Тиде арнян гына 3 тыгай туткар лийын. Шочмын, 18-ше майыште Сеҥымаш бульварысе ик пӧрт воктене БМВ автомашина йӱлаш тӱҥалын. Иномаркын озаже тудым ондак шке йӧрташ тыршен, вара тулпатыр-влакым ӱжыктен. 19-ше майыште Йошкар-Оласе рӱдӧ пазар воктене Рено машина ылыжын. Салон кӧргыштӧ перчатка йӱлаш тӱҥалын улмаш. Тушко тамака деч ломыж логалын. Тиде кечынак ик автомобиль кооперативыште гараж гыч лекше шикшым шекланеныт. Тушто Газель автомашина йӱлен. Могай амаллан кӧра пожар тӱҥалын, специалист-влак рашемдат.