ЕГЭ 29 июньышто тӱҥалеш.
Коронавирус илышнан чыла шӧрынышкыжат вашталтышым пуртен. Туныктымаштат шке кышажым коден. Школлаште тунемше-влаклан нылымше чырыкым мӧҥгӧ гыч лекде тунемаш логалын. Моло тунемме тӧнежлаштат шинчымашым дистанционно погеныт. Туныктымо системышке пуртымо вашталтыш-влак шумлык Россий президент погынымашым эртарен. Тушто теве мо рашемын: 9-ше классым тунем пытарыше-влак экзаменым огыт кучо. 11-ше классым пытарыше-влакын Кугыжаныш экзаменышт 29-ше июньышто тӱҥалеш. ЕГЭ-м вузышко тунемаш пураш шонышо выпускник-влак веле кучат. Кӱшыл тунемме тӧнежлаште приемный кампаний августышто тӱҥалеш. Пытартыш жапыште дистанционный йӧн дене тунеммашым Россий туныктымо системыш эрелан пуртынешт манме шокта. Тиде тыге огыл, манын президент. Тудо «Туныктымаш нерген» законышко пуртышаш вашталтыш-влакым Россий Кугыжаныш Думышко колтен.