Александр Евстифеев Козьмодемьянск олаште кугу проект- влакым кузе шыҥдарымым терген
Марий Элым вуйлатыше Александр Евстифеев Козьмодемьянск олаште кугу проект- влакым кузе шыҥдарымым терген. Олам социально- экономически вияҥдыме йодыш дене Правительствын выездной заседанийже деч вара Республикым вуйлатыше оласе кӱлешан объект- влакым ончен лектын. Эн ончыч тудо 825 верлан у школым чоҥаш палемдыме верыш миен. Пытартыш школым тушто 1986-шо ийыште почмо. У школым вес ийын чоҥаш тӱҥалаш палемдыме. Паша дене коштмо радамыште Глава тыгак очистной сооруженийыш миен. Тудо кызыт «Юл эҥерым тазаҥдымаш» федерал проект почеш пужен ышталтеш. Объектым 40 процентлан шуктымо. Август кыдалне икымше оборудований толшаш, кокымшыжо- октябрьыште. Идалык мучашлан пашам пытарышаш улыт. Александр Евстифеевын ончымо вес верже Козьмодемьянск оласе «Дарование» школ- интернат лийын. Тушто пищеблок шотышто йодыш лектын. Столовыйын зданийже тӱвыра памятниклан шотлалтеш. Тудым йыжыҥын-йыжыҥын олмыкташ палемдыме. Республикым вуйлатыше дене Андрей Баранов Юл серыште причалым чоҥышаш верыш миеныт. Чоҥаш оксамат палемдыме. Пашам вес ийын мучашлышаш улыт. Андрей Барановлан тыге каласен: ме партнёрлык кылым вучена. Олам турист кластерыш савыраш шонена. Олан мэрже Михаил Козлов ешарен: Козьмодемьянск федерал программыште участвоватлен да сеҥышыш лектын. Тудын кӱшеш эҥер сер ден рӱдӧ площадьым уэмдыме проект ышталтеш. Вес ийын ыштен шуктышаш улына,- манын.