Йошкар-Ола гыч пӧръеҥ уэш йӱшӧ вуя машинам виктарымыжлан суд ончыко шогалеш
Йошкар-Ола гыч пӧръеҥ уэш йӱшӧ вуя машинам виктарымыжлан суд ончыко шогалеш. 47 ияш пӧръеҥ шотышто уголовный пашам шымлен пытарыме. Шымше октябрь йӱдым Кугыжаныш автоинспектор- влак Зарубин ден Первомай урем корнывожышто машинам тергаш чареныт. Водитель документшым ончыктен кертын огыл, тиддеч посна тудын орвуян улмыж шотышто инспекторын кокытеланымашыжым шочыктен. Полицейский служебный машинаш шинчаш кӱштен, но тудо йодмашым шотыш налын огыл да шылаш тӧчен. Тудым поктен кудалыныт, но подылшо еҥ машинам виктарен сеҥен огыл да кӱртньӧ саварыш миен кертылтын. Тергымеке рашемын: тудын вӱрыштыжӧ алкоголь нормо деч куд пачаш шукырак улмаш. Адакшым тыгак йӱшӧ вуя руль воктеке шичмылан ондакат административно мут кучаш шогалтыме улмаш. Тунам тудлан 30 тӱжем теҥге штрафым тӱлыкташ да ик ият 7 тылзылан права деч посна кодаш ыштыме улмаш. Тиде гана ынде уголовный пашам тарватыме.
