Самырык дзюдоистка округышто сеҥышыш лектын

Марий Эл гыч дзюдоистка Юл кундем округын Первенствыштыже сеҥышыш лектын. Оренбург олаште Аделина Хайруллина 40 килограмм марте нелытан- влак коклаште икымше верым сеҥен налын. Олимпий резерв училищын тренерже- влак Сергей ден Андрей Ялпаевмытын да Сергей Гуляевын тунемшышт Марий Элын командыштыже эн куатан лийын. Тудо ныл кучедалмашым эртарен да кажныштыже ончылгоч сеҥышыш лектын. Башкортостан гыч  ваш шогышым ик минутат пелыште сеҥен, Пермь край гыч дзюдоисткым куд секундышто, Самара область гыч спортсменке дене кум минут утла кучедалын, вара финалыште Самара область гыч эше ик ӱдырым сеҥен. Оренбургышто округын первенствыштыже медаль верч чылаже  14 регион гыч 468 рвезе ден ӱдыр кучедалыныт. Марий Эл гыч 11 еҥ лийын.