Марий Элыште корным чоҥымо паша воранен толеш
«Лӱдыкшыдымӧ да сай качестван автомобиль корно- влак» калыкле проектым илышыш шыҥдарыме дене Марий Эл ончылно кайыше регион- влак радамыш пурен. Тидын нерген Россий правительство вуйлатышын алмаштышыже Марат Хуснуллинын эртарыме селектор совещанийыште Элысе транспорт министрын алмаштышыже Андрей Костюк увертарен. Видеоконференций йӧн дене эртарыме совещанийыште Марий Элым вуйлатыше Александр Евстифеев лийын. Андрей Костюкын мутшо почеш, пандемийым ончыде, тенийлан палемдыме паша- влак жапыштыже мучашлалтыт, а южо показатель дене ончылтымашат уло. Тений ончылно кайыше регион- влакын спискышт ешаралтын. Кодшо ийын 10 лидер да 10 почеш кодшо регион лийын. Тений Адыгея, Калуга, Новгород, Угарман, Новосибирск, Оренбург, Саратов областьла, Ставрополь край, Башкортостан да Марий Эл ешаралтыныт. Марий Элыште калыкле проектым тений шыҥдараш кум миллиардат 400 миллион теҥгем кучылтшаш. Корнылам норматив марте марте шукташ 47 контарктым ыштыме. Идалык мучаш марте 170 меҥге утла кужыт автомобиль корным олмыктымо лиеш. Тидыже кодшо ийысе деч 35 меҥгылан шукырак. Тачысе кечылан 158 меҥгым эксплуатацийыш налме. Кызыт Йошкар-Оласе кугу магистральыште паша шукталтеш. Тидын годымак 2021-ше 2022 ий- влаклан корным чоҥаш да олмыкташ контракт- влак пеҥгыдемдалтыт. Шушаш ийлан ыштыме контракт почеш ик миллиардат 800 миллион теҥгеаш пашам шуктыман. Тидыже 64 процент лиеш. 2022-шо ийлан палемдыме объект- влаклан 14 процент контарктым ыштыме. Графикым ончылтен пашам ышташ задачым Александр Евстифеев шынден. Тидыже планым ончылтен темаш да норма марте шуктымо корным ешараш полша.
