Тений кеҥеж каныш дене 62 тӱжем йочам авалташ палемдыме
Республикысе кучем кеҥежымсе тазалыкым пеҥгыдемдыме кампанийлан ямдылалтеш. Йоча- влаклан каналташ да тазалыкым пеҥгыдемдаш йыла йӧным ыштыме лиеш. Элна мучко кеҥеж каныш нерген Российысе Правительстве председательын алмаштышыже Татьяна Голикован эртарыме совещанийыште ойлымо. Тушто Марий Элым вуйлатыше Александр Евстифееват участвовтален. Кодшо ийын элна мучко 851 тӱжем йоча каналтен. Тидыже 19-ше ийысе деч куд пачаш шагалрак. Тений ныл миллионат кум шӱдӧ тӱжем йоча лагерьлаште лийшаш. Марий Элыштат ямдылалтмаш шукертак тӱҥалын. Тылзе ончыч республикым вуйлатыше путёвкын акшым субсидироватлаш кӱштымашым пуэн ыле. Тений 184 лагерь почылтшаш. Тушто 16 тӱжем йоча каналтышаш. 42 тӱжем йоча кочкыш деч посна школ пеленысе лагерьлаште лиеш. Кок тӱжем йоча республике деч ӧрдыжтӧ тазалыкшым пеҥгыдемда. Тыге канышын тӱрлӧ формыжым кучылтын каныш дене 62 тӱжем йочам авалташ палемдыме.