Республикыштына школышто тунемше- влаклан производство предприятийлашке экскурсийлам эртарат

             Республикыштына школышто тунемше- влаклан производство предприятийлашке экскурсийлам эртарат. Тиде пашам ончылгоч профессионал ямдылыме рӱдер шукта. Октябрь гыч март марте тӱжемат 300 тунемше республикысе производствын кузе пашам ыштымыжым ончен, тӱрлӧ профессийыште тыршыше- влакын пашаштым эскереныт. Мартыште экскурсийыш Куженерысе Йӱледӱр школын, Оршанке районысо Кугунур школын, Йошкар-Оласе 3-шо, 7-ше, 17-ше школла гыч, Советский Келмаксола, Звениговысо Чакмарий, Волжскысо Пӧтъял школла гыч тунемше- влак миеныт. Южыжо «Искра» колхозын машина да трактор паркшым онченыт,  молылан «Родина» ушемым ончыктеныт, тушто тыглай пӱчкыш гыч неле, йӧсӧ деталь- влакым ямдылат. Оласе школлаште тунемше- влак «Троллейбус транспорт» предприятийын пашаже дене палыме лийыныт. Тыгак экскурсийым «Овощная лагуна» ял озанылк предприятийыш, Йошкар-Оласе «Труженица» фабрикыш эртарыме. Кызыт шке площадкылаштышт тунемше- влакым республикысе 50 организаций ден предприятий вучат,- палемдат Тунытктыш министерствыште.
         Фото: Туныктыш министерстве.