9-ше номеран троллейбус шке коштмо схемыжым вашталта

                     Йошкар-Олаште 9-ше номеран троллейбус шке коштмо схемыжым вашталта. Оласе да Медведевысе калыкын йодмыж почеш 1-ше декабрь гыч Опытный поле гыч кумшо микрорайоныш коштшо 9-ше номеран троллейбусын маршрутшо вашталтеш. Троллейбус траснпорт предприятийын увертарымыж почеш тролейбусшат ешаралтеш. Ынде корныш ныл машина лектеш. Тымарте Опытный поле гыч толын, тудо Подольск курсант- влак уремыш вигак туралан Машиностроитель урем дене кая ыле. Ынде «Дружба» стадион ден «Телецентр» чарналтыш- влак лектын возыт. «Сеҥымаш парк» чарналтыш деч вара тудо Ленин проспектыш савырна, Первомай уремыш лектеш, вара Пролетар урем дене шке маршрутышкыжо лектеш. Тыге тудын маршрутыштыжо Рябинин урем, Ленин проспект-Пазар, Сеҥымашын 30-шо идалыкше лӱмеш тӱвыра полат, Первомай урем, Пролетар урем, Республикысе эмлыме вер чарналтыш- влак ешаралтыт.