Теҥгече У Торъял посёлкышто «Шарнымаш венок» ден «Шарнымаш сорта» акций- влак эртеныт

Теҥгече У Торъял посёлкышто «Шарнымаш венок» ден «Шарнымаш сорта» акций- влак эртеныт. Нуным книгагудын, партийын еҥже- влак да Самырык- влакын «Антарес» ушемышт ямдыленыт. Обелиск воктене ныл шагат эрдене, сар тӱҥалме жапыште чумырген, нуно сортам чӱктеныт, а вара, ынде кудымшо ий почела, Немда эҥерыш венокым колтеныт. Тыге нуно шке илышыштын акше дене мыланна тыныс кавам пӧлеклыше- влакым шарналтеныт. Кечывалым Тыныслык площадьыште организаций ден тӧнеж- влакын пашаеҥышт, верысе калык «Курымеш калык шӱмыштӧ» лӱман митингыш погыненыт. Тудым муниципал районым вуйлатыше Евгений Небогатиков почын. Погынышо- влак кугу Сарыште вуйым пыштыше- влакым ик тат шып шоген шарналтеныт да элым аралыше- влаклан мемориал воктеке пеледыш аршашым пыштеныт.