Сергей Карякинын шахмат школыштыжо Россий таҥасымаш мучашлалтын
Йошкар-Олаште Сергей Карякинын шахмат школыштыжо Россий кубкын «Марий мландыште» йыжыҥже мучашлалтын. Турнирыште Российысе 11 субъект гыч 89 самырык шахматист участвоватлен. Нуно 9, 11, 13 да 15 ияш марте лийыныт да 8 комплект медаль верч кучедалыныт. Индеш тур деч вара 8 эн виян шахматист рашемын. Нуно чыланат, манме гаяк, Марий Эл гыч улыт. 10 ияш марте рвезе- влак коклаште Испанийыште эртыше шахмат дене тӱнян первенствыштыже кодшо ийын той медальым налше Максим Волков, таҥасымашын лектышыже почеш, икымше верыш лектын.
