Волжскышто шӱкшакым оптымо контейнер ок сите

Республикысе пӱртӱс поянлык министр Алексей Киселёв «Калык контроль» проект дене келшышын, Волжск олаш миен да калык дене вашлийын. Тидлан амалым олаште илыше еҥ-влакын йыҥгырышт пуэн. Нуно олаште шӱкшак оптымо контейнерын да нуным вераҥдыме площадкын шагал улмышт, нунын тоштеммышт, шӱк-куштырам шупшыктышо машинан ситыдымыже шотышто вуйым шийыныт. Министр палемден: икмыняр уремым ончен савырнышна, йодыш- влак, чынжымак, улыт. Ме нуным кӱчык жапыште шымлен лектына да ситыдымашым кораҥдыме корным палемдена. Волжск олам правительстве посна контрольышто куча да тӱткышым эн ончычак ойыра. Министр ӱшандарен ойлен: 6-шо агустышто регионысо оператор дене Волжскыш уэш толыт да мом ыштышашым рашемдат.