Марий Эл тений шошо вӱдын шагал шарлыме регион- влак коклаш пурен

               Марий Эл тений шошо вӱдын шагал шарлыме регион- влак коклаш пурен. Тыгеже  Марий Эл да икмыняр регионышто вучыдымо происшествий лийын огыл, сурт-печым, участкылам вӱд налын огыл. Тыгай статистикым РИА Новостин ыштыме инфографике да «Марий чодыра» калыкле паркын пашаеҥже- влакын уверышт  пеҥгыдемден ончыкта. Нуно вӱдшор тӱҥалме годсек 8-ше апрель гыч эскерен шогат. Вӱдшор 9 кечылан ондак тӱҥалын. Паркын кугыжаныш инспекторжо- влак вӱдын молгунамсе деч шагал улмыжым палемдат. Мутлан Мушанер ер- влак коклаште кугу кумдык дене вӱд ушнен шоген гын, тений уке. Тыгак Элнет эҥерыштат. Эҥерын тошто йогыжо- влак вӱд дене темыныт гынат, кӱкшытшӧ молгунамсе деч шагалрак. Паркын пашаеҥже- влак палемдат: республикыште шошо вӱдшорын эн кугу пагытше эртен. Инфографикым ончаш гын, мемнан лишыл пошкудо- влак Татарстан ден Чувашийыштат вӱдшор шотышто нелылык лектын огыл.
            Фото: «Марий Чодыра» калыкле парк.