Йошкар-Олаште «Палантайын апрельже» лиеш

           Йошкар-Олаште «Палантайын апрельже» лиеш. Иван Степанович Ключников-Палантайын пӧрт-тоштерыштыже 23-шо гыч 27-ше апрель марте «Палантайын апрельже» тӱвыра акций лиеш. Тудо лӱмлӧ композитор, марий профессионал семлан негызым пыштыше Иван Палантайын шочмыжлан 138 ий теммылан пӧлеклалтеш. Композитор Звенигово районысо Кокшамарий кундемеш 1886-шо ийын 23-шо, тошто стиль дене 11-ше апрельыште шочын. Илышыжын кугу ужашыжым марий музыкым вияҥдымылан пӧлеклен. Акцийын программыштыже «Шарнымаш кас» да чапкӱжӧ воктеке пеледыш аршашым пыштымаш, обзор да тематик экскурсий, тоштер программе, Палантай лӱмеш тӱвыра да сымыктыш колледжыште «Палантайын илыш да усталык корныжо» куснылшо баннер выствкыште экскурсий лийыт.
         Фото: И.С.Ключников-Палантайын пӧрт-тоштерже.