Йошкар-Олаште аварий лӱдыкшым лукшо 63 пӧрт уло
Йошкар-Олан мэрже Евгений Маслов аварий лӱдыкшым лукшо тошто пӧртла гыч еҥ-влакым кусараш чоҥалтше шуко пачеран пӧртыштӧ паша кузерак кайымым терген лектыт. Тиде пӧртым «Мирный» микрорайонышто нӧлтат. Чоҥымашлан вуйын шогышо-влак чыланат график почеш кая манын ӱшандарат. Октябрь марте тудым чоҥен шуктышаш улыт. Тачысе кечылан Йошкар-Олаште аварий лӱдыкшым лукшо 63 пӧрт уло. Тушечын еҥ-влакым кусарыме паша икмыняр этап дене эрта. Идалык мучаш марте 16 тоштемше пӧрт гыч 400 наре еҥлан у илыме верым пуыман.