Республикысе тӱҥалтыш класслаште чыла тунемшым шокшо кочкыш дене пукшат
Республикысе тӱҥалтыш класслаште чыла тунемшым шокшо кочкыш дене пукшат. Таче Россий Правительстве председательын алмаштышыже Татьяна Голикова тӱҥалтыш класслаште шинчымашым налше йоча- влаклан шокшо кочкышым ситарыме шотышто пашаче группын кумдаҥдыме заседанйжым эртарен. Совещанийыште Марий Элым вуйлатыше Александр Евстифеев участвоватлен. Кызыт 39 тӱжемат 200 школышто икымше гыч 4-ше класс марте тунемше шым миллионат 300 тӱжем йоча шокшо кочкышым кочкеш. Но тиде пашам виктараш федерал бюджет гыч оксам тудо школлан гына пуат, кушто тиде пашалан чыла йӧнат уло. Марий Элыште Республикым вуйлатыше Александр Евстифеевын кӱштымыж почеш 248 школын пищеблокшым кӱлеш технологический, йӱкшыктарыше оборудований да инвентарь дене пойдарыме. Тидлан республикын бюджетше гыч ешарен 27 миллион теҥгем ойырымо ыле. Ик тужем утла оборудований ден инвентарьым налме. Тиде паша умбакыжат шуйна. Шокшо кочкыш дене пукшымо йӧным саемдаш манын, Козьмодемьянскысе «Дарований» школым пужен ышташ, Оршанке районысо Кугунур школ деке ешарен пищеблокым чоҥаш, Килемар районысо Йӱксар ялыште школ пелен интернатым да пищеблокым чоҥаш палемдыме. Кызыт чыла тунемшым шокшо кочкыш дене авалтымаш 89,9 процентыш шуын. Яра шокшо кочкышым тыгак начар тазалыкан да шуко шочшан ешла гыч йоча- влак налыт. Кочкышын качествыжым терген шогат.
