Республикыштына оласе йӧнан кумдыкым ыштыме проект чолган шыҥдаралтеш

                        Республикыштына оласе йӧнан кумдыкым ыштыме проект чолган шыҥдаралтеш. Таче Марий Элым вуйлатыше Александр Евстифеев регионлам вияҥдыме правительстве комиссий президиумын заседанийыштыже участвоватлен. Тудым Россий правительстве председательын алмаштышыже Марат Хуснуллин эртарен. Совещаний видеоконференций йӧн дене эртен. Марат Хуснуллинын палемдымыж почеш, кызыт Премьер- министрын кӱштымыж почеш Российым 2030-шо ий марте социал- экономик велым вияҥдыме стратегийын проектшым ямдылыме шотышто кугу паша шукталтеш. Пеш кугу задачым шындыме. Тушко чоҥымо отрасль, инфраструктурым чоҥымашат пура. Заседаний годым шыже-теле жапым эртыме да йӧнан оласе кумдыкым ыштыме йодышымат каҥашыме. Республикыште шыже-теле жаплан график почеш ямдылалтме да палемдыме жапыште шуктымо. Оласе йӧнан  кумдыкым ыштыме шотышто кодшо ийын 98 кудывече да тӱшка кумдыкым тӱзландарыме. Тений 84 кумдыкышто пашам шукташ палемдыме. Кызыт вич кумдыкышто паша кая: Козьмодемьянскыште, Звениговышто, Куженер, У Торъял, Приволжский посёлкылаште, Медведево вел Нурмаште уремым волгалтарен шуктымо. Тиддеч посна Российысе конкурсышто сеҥышыш лекше проект- влак умбакыже шыҥдаралтыт. Кеҥежым Козьмодемьянскын историй ужашыжым тӱзландарен шуктышаш улыт, Волжск олаште Тумер отышто паркым ыштат. 2022-шо ийыште Тӱзатышаш кундем- влакым ойырен налме шотышто рейтинг йӱклымаш лиеш.