Марий Эл правительстве верысе инициативе проект- влакым илышыш шыҥдараш оксам ойыра
Марий Элын правительствыже верысе инициативе проект- влакым илышыш шыҥдараш 24 миллионат 800 тӱжем теҥгем ойыра. Республикыштына верысе калыкын тӱҥалме да правительствын сайлан шотлымо ола, села да ял кундемлам тӱзландарыме проектлам шыҥдараш тӱҥалме. Тенийсе программыште 37 илем участвоватла. Тушто илыше- влак ик ий ончыч шке проектыштым ямдыленыт да конкурсым эртеныт. Чыла районла гыч 38 проектым шукташ палемдалтеш, тыгак Волжск гыч кокыт да Козьмодемьянск гыч икте. Шуко проектше корным, кӱварым олмыктымо, йоча модмо да спорт площадкылам чоҥымо дене кылдалтыныт. Тиддеч посна икмыняр илемыште чапкӱ ден мемориалым олмыкташ, уремым волгалтараш палемдыме. Мутлан, Медведево посёлко ден Упша селаште тазалык аллей ден паркым тӱзатыме лиеш. Эн ончыч Кокшайскысе администраций шке планжым шукташ тӱҥалын. Проект почеш тений Кокшайскыште контейнер площадкым уэмдат. Тымарте верысе калык деч оксам погеныт- тидат проектын ик ужашыжлан шотлалтеш. Кодшо ийын селаште у контейнер- влакым вераҥдыме, тений 16 контейнер площадкым ыштат. Проектын акше 649 тӱжем теҥгеш шуэш. Тушечын 484 тӱжемже республикын казнаж гыч, 100 тӱжемже илем адаминистарцийын, 65 тӱжемже ялысе калыкын оксаже. Тений проект- влак кокла гыч эн кугу субсидийым Козьмодемьянск налеш. Тушто вуйым пыштыше воин- влаклан обелискым капитально олмыктат. Ик миллион гыч корным олмыкташ Волжский велысе Красная Горка, Медведево районысо Пӱкшерме, Морко Шеҥшыште кӱварым олмыкташ, Медведевыште Тазалык Аллейым тӱзландараш, Михайловкышто модмо площадкым чоҥаш налыт. Шке кундемым тӱзландараш шонышо- влак верысе самоуправлений органлаш йодмашым пуэн, пырля проектым ямдылен кертыт. 2022-шо ийлан конкурсым уже увертарыме.
