Республикым вуйлатыше паша дене Волжскыш мийымыж годым у спорт объект- влакым ончен да Волжск олам вияҥдыме советын заседанийыштыже лийын
Спорт, экономика, ола озанлык, социал сфера, граждан общество: Волжск олаште тӱҥ йодыш- влакым да нуным виктарыме корным палемдыме. Теҥгече Республикым вуйлатыше Александр Евстифеев паша дене тушко мийымыж годым уэмдыме ече базым ончен, физкультура да тазалыкым пеҥгыдемдыме комплексым почын да Волжск олам стратегически вияҥдыме мер советын заседанийыштыже лийын. Александр Евстифеев тренер, спортсмен- влакым да верысе калыкым ече базым олмыктен пытарыме дене саламлен. Тушто трассым вашталтыме, волгыдым пуртымо, тидыже кастенат мунчалташ йӧным пуа, спорт да моло оборудованийым налме, медицина йодышат вашке рашемдалтшаш, трассылан лумым лаптыртыше машинам налме. Волжскышто 54 процент калык спорт дене кылым куча. Спорт алан тиде олаште чолган вияҥеш. 18-ше ийыште Спорт полатым капитально олмыктымо, оласе стадионым пужен ыштыме, кодшо ийын «Марбум Арена» футбол пасум чоҥымо. 20-шо ий ФОК-ым да ече трассым почмо дене тӱналеш. Приволжский посёлкышто ФОК-ым чоҥен пытарат. Марий целлюлоз-кагаз комбинат кундемыште верланыше физкультура да тазалыкым пеҥыдемдыме комплексым почмашат торжественно эртен. ФОК пеш чапле лийын. Тушто спорт дене кылым кучаш чыла ыштыме. Тидыже спортым эшат вияҥдаш йӧным пуа. Паша визитым иктешлымашлан Волжск олам стратегически вияҥдыме мер советын заседанийже шотлалтын. Тушто правительствын еҥже- влак да верысе калык лийын. Республикым вуйлатыше пӱсӧ йодыш- влакым каҥашаш министерствылам вуйлатыше- влак дене вашлийме графикым ышташ темлен. Советын еҥже- влаклан ола администраций да депутат- шамыч дене пырля олам вияҥдыме проект- влак дене пашам ышташ кӱштен. Верысе калык тургыжландарыше ятыр йодышым пуэден.