«Шочмо мландын куатле вийже» усталык отчёт фестиваль тӱҥалеш

31-ше январьыште 15 шагатлан Йошкар-Оласе Сеҥымашын 30-шо идалыкше лӱмеш тӱвыра полатыште Кугу Сеҥымашлан 75 ий темме да Марий Элын 100 ияш лӱмгечыжлан пӧлеклалтше «Шочмо мландын куатле вийже» усталык отчёт фестиваль тӱҥалеш. Тудым Йошкар-Ола почеш. Усталык программым шочмо мланде гыч налме рокым пыштыман чондай ушен шога. Тудым марий кундемын курымаш историйже, сар да сеҥымашын историйышт,  ойыртемалтше калыкын да патырлыкын историйышт гоч нумал эртат. Полатын икымше да кокымшо пачашыштыже тӱрлӧ выставке лиеш. Тиде Республикысе калык усталык фестиваль январь гыч март марте чыла ола ден районлаште эрта, кажныже шке отчёт программыжым ончыкта. А 6-шо майыште Сеҥымашын 30-шо идалыкше лӱмеш тӱвыра полатыште фестивальын гала-концертше лиеш.