Республикыштына фольклор да этнографий экспедиций тӱҥалын

           Республикыштына фольклор да этнографий экспедиций тӱҥалын. 27-ше июнь гыч 3-шо июль марте Российысе калык- влакын тӱвыра поянлыкыштлан пӧлеклалтше идалык кышкарыште тиде экспедиций эртаралтеш. Тушто калык промысел мастар- влакын пашаштым войзат да погат. Тышке кажне кечын кучылтмо ӱзгар, калык вругемым ыштыше- влак, йомак, муро, тушто, легенда, калык мут, пайрем да илыш йӱла пурат. Теҥгече республикын тӱвыра министрже Константин Иванов экспедицийын еҥже- влак дене вашлийын. Группым вуйлатыше Россий Науко Академийын член-корреспондентше, историй наука доктор, профессор Александр Черных экспедицийын пашаже нерген каласкален. Экспедицийыш Урал округысо историй да археологий институтын Пермьысе филиалжын вич еҥже пура. Нуно Оршанке районышто лийыныт. Тыгак планыштышт Килемар, Юрино, Шернур, Морко, У Торъял районлашке мияш палемдыме. Экспедицийым Россий тӱвыра министерстве учредитлен, Российысе Поленов лӱмеш калык усталык пӧрт ямдылен.
           Тӱвыра министерствын фотожо.