«Ныжыл сем» «Руш пасум» сӧрастара
Шушаш шуматкечын Москосо «Коломенское» тоштер-заповедник кундемыште славян сымыктышын «Руш пасу» регион кокласе 8-ше фестивальже эрта. Тушко элысе 60 кундем гыч уна- влак чумыргат. Марий Элынат делегацийже лиеш. Тиде фестиваль Москон тӱвыра илышыштыже ик эн тӱҥ событийлан да элысе кугу фольклор мероприятийлан шотлалтеш. Идалык еда тудо мурым мурышо, кидпашам ыштыше, сатум лукшо кок тӱжемат 500 наре еҥым уша. Тений фестиваль театрын идалыкшылан, порылыклан пӧлеклалтеш. Марий Эл гыч тушко Йошкар-Оласе «Ныжыл сем» фольклор ансамбль, кӱслем ыштыше, тӱрлызӧ, марий тӱран вурегмым ямдылыше- влак каят.
