Курык марий район ял озанлык шотышто эксперимент площадке лийын кертеш

 Ленинград областьыште «Пӱтынь Российысе пасу кече» кажне ийын эртарыме кугу агротехнологий выставке лийын. Тушко 8 тӱжем наре аграрий погынен. Шкеныштын продукцийыштым, сеҥымашыштым, уым ямдылымыштым уло эл гыч 200 утла ял озанлык организаций- влак ончыктеныт. Выставке кышкарыште мланде пашам ыштыме у технологий, производствын у йӧнжӧ- влак, ял озанлык технике, ял озанлыклан у урлык- влакым ужаш лийын. Марий Эл гыч тушто ял озанлык министр Александр Гречихон вуйлатыме делегаций лийын. Тудо агропромышленный комплексым вияҥдыме дене кылдалтше кумда программыште участвоватлен, ятыр вашлиймаш эртен. Интеллектуал ял озанлык рӱдерын директоржо Сергей Антипин да Российысе туныктыш министрын полышкалышыже Екатерина Журавлёва дене  Марий Элым овощеводство корно дене «Интеллектуал ял озанлык» проектыш пуртымо нерген мутланыме. Министрын мутшо почеш Курык марий район ял озанлыкыште у интеллектуал технологий- влакым тергыме шотышто у площадке лийын кертеш.