17 04 2019 Поро эр, Марий Эл [слушать]
Провой кундем Кожласола гыч Изи Каринам шукын палат. Каринан пиалже – сем тӱняште. Ӧрат веле, кузе тиде сокыр ӱдыр, семӱзгарыште паҥгам муын, семым луктеш да мурым шочыкта. Каринан усталыкшым вияҥдымаште коваже Лидия Пантелеевна чот тырша, тыгак ӱдырлан полшаш ямде улшо йолташ-влакат воктенак улыт. Тений Карина тунемаш тӱҥалын, коваж ден кочаже лийше тудым Волжский районысо Карай школышко кондыштарат. Каринан пиалешыже, тиде кундемыште начарын ужшо йоча-влак дене пашам ыштыше специалист уло. Ялысе школышто кузе тыгай йӧн лекме нерген школ директор Любовь Анатольевна Сергеева каласкала. Карай школлан инвалид йочам туныкташлан келыштарыме туныктымо пособий дене полшаш ямде улмо нерген Начарын ужшо-влаклан Савинысе интернат-школын директоржо, Марий Эл Республикысе туныктышын сулло пашаеҥже Константин Аскарович Ахмадишын ойлыш. Тиде туныктымо тӧнеж начарын ужшо-влаклан республикныштына икте веле. Тений тудлан 85 ий темеш.