10 04 2019 Поро эр, Марий Эл [слушать]
Марий кундемна сылне чодыра, кумда пасу ден олык, ший эҥер ден ерлан, тӱрлӧ янлык да кайыквусылан моткоч поян. Марий Элыште ик эн сылне да ойыртемалтше верлан «Кугу Какшан» заповедникым шотлаш лиеш. Тиде ужар лук ынде 26 ий наре шке законжо дене ила, манаш лиеш, тушто сонарлаш, кӱтӱм кӱташ, чодырам руаш да шонымо семын заповедникышке пурашыжат огеш лий. Шанчыеҥ-влак тыште кушкыл ден янлык-влакым эскерат, пӱртӱсыштӧ лийше тӱрлӧ вашталтышым шымлат. «Кугу Какшан» пӱртӱсым аралыме вер нерген таче мыланна заповедникын кугурак пашаеҥже, биолог Геннадий Богданов каласкала. Шукерте огыл тудо мемнан студийнан унаже лийын. Геннадий Алексеевичым пӱртӱсын эн ӱшанле йолташыжлан шотлаш лиеш. Заповедникыште тудо эн тӱҥалтыш гычак пашам ышта.