«Марий Эл» ГТРК-ын шӧртньӧ фондшо гыч. «Мӱкш отар» радиоспектакль

«Мӱкш отар» радиоспектакль Марий радион «шӧртньӧ» шӧрлыкыштыжӧ 1956-шо ий гыч аралалтеш. Тачысе кече марте тудо шуко гана эфирыште йоҥен. Радиом колыштшо-влак тудым эреак эфирыш лукташ йодыт. Ме нунын йодмашыштым уло кумылын шуктена да кызытат кумылыштым огына волто. Вет тыште тыгай уста да тале, марий калыкын йӧратыме артистше-шамыч модыныт, тиде Пӧтр - Тимофей Григорьев, Клавий - Майя Романова, Марпа-Мария Михайлова, Пӧтр вате-Анастасия Страусова, Евсей - Иван Якаев, Онтон - Андрей Кудрявцев, Йыван - Виктор Бурлаков, Онтон вате - Елена Сошникова. Режиссёр - РСФСР культурын сулло пашаеҥже Сергей Иванов. Семым МАССР культурын сулло пашаеҥже Кузьма Смирнов келыштарен. Икманаш, С.Г.Чавайнын «Мӱкш отар» пьесыж почеш шындыме спектакльыште артист-влаклан чон вургыжтарыше образым чоҥашышт сай драматический материлым пуэн, марий койыш-шоктышым, калык йӱлам, ойпогым палымыже сценыште модашлан чапле йӧным ыштен.