У ий пайрем годым йӱшӧ вуя руль воктеке шичше- влакым тӱткын эскерат

             Марий Элыште У ий пайрем годым йӱшӧ вуя руль воктеке шичше- влакым тӱткын эскераш тӱналыт. 27-ше декабрь гыч 7-ше январь марте республике мучко «Йӱшӧ водитель» оперативно-профилактик мероприятий эрта. Пайрем жап ГИБДД пашаеҥ- влаклан эре тургыжландарыше пагыт. Калык тӱшкан кевыт ден ужалкалыме рӱдерлашке коштеш. У ийым вашлиймеке, ятырже пӱртӱсыш лектеш але уналыкеш кая. Лач тыгай годым корнышко подылшо водитель але йолешке- влак лектын кертыт. Мутлан, кодшо ийын йӱшӧ водитель- влаклан кӧра кок ДТП лийын, тушто кум еҥ колен да ик еҥ эмганен. Сандене корно туткарым кораҥдаш манын 7-ше январь марте корнылаште ДПС патруль наряд- влак ешаралтыт. Чыла ола ден районлаште рейд да тӱшкан тергымаш- влак эртаралтыт. Корнышто шкем кӱлеш семын кучыдымо водитель да йолешке- влак нерген 68-09-70 номеран телефон дене йыҥгырташ йодыт.
             Фото: "Волжская правда".