Таче, 22-шо июнь, - Шарныме да ойганыме кече

           Таче, 22-шо июнь, Шарныме да ойганыме кече- 1941-ше ийын Кугу Ачамланде сар тӱналме кече. Тидын вашеш теҥгече сареш вуйым пыштыше- влакым шарнымаш Йошкар-Олаште Россий кӱкшытан калыкле поро кумыл акций  йӱла семын Воин Чап Моумент воктене эртен. Марий Элым вуйлатышын сомылжым шуктышо Юрий Зайцев палемден: тиде ойган дате- 1941-ше ий 22-шо июнь калык шӱмыштӧ курымеш мондалтдыме сусыр семын кодеш. Погынышо- влак сортам чӱктеныт. Лач 21 шагатлан чыланат вуйым пыштыше- влакым ик тат шып шоген шарналтеныт. Тиде акцийыш идалык еда тӱжем наре еҥ ушна. Тений оласе сортам Тихвин черкыште святитлыме да мотопробег дене ола мучко коштыктен савырныме. Тиде сорта деч чыла муниципал образований тулым налын шке сорташтым ылыжтеныт. Сортам шындылын тений «Йошкар-Ола шарна» шомакым возеныт.
             Фото: Марий Элым вуйлатышын организаций да аналитик виктемже.