«Пеледыш пайрем» тений Йошкар-Олаште 18-ше июньышто эрта

           Поро йӱлаш савырныше «Пеледыш пайрем» тений Йошкар-Олаште 18-ше июньышто эрта. Калыкле тӱвыран Россий кӱкшытан фестивальже Российысе калык- влакын тӱвыра поянлык идалыкыштлан пӧлеклалтеш. Йӱла семын пайрем «Агавайрем» кумалмаш гыч тӱҥалеш. Марий онаеҥ- влак тудым Пӱнчерын Тумер отыштыжо эртарат. Пеледыш пайрем рӱдӧ оласе куд площадкыш калыкым чумыра. Лу шагат наре жапыште Российысе кундемла гыч оласе, ялласе 30 утла профессионал ансамбль, фольклор да эстрада коллектив- влак мастарлыкыштым ончыктат. Программыште «Кудо» конкурс, «Гармоньчо» фестиваль, «Черемис модмаш», «Шӱдыран марий кава» этнодискотеке да молат лиеш.
          «Пеледыш пайремын» районлаште кузе эртыме радамыштат пале лийын. Мутлан, нылымше июньышто  тудым Советский районышто пайремлат. А 11-ше июньышто весела канышыш Оршанке, Медведево, Курык марий районлаште ушнат. Вара эстафетым Морко, Волжский, Куженер, Марий Турек, Звенигово, Параньга, Шернур, У Торъял район-влак да Волжск ола авалтат. Тушто пайрем 12-шо июньышто эртаралтеш.