Марий Элым вуйлатыше коронавирусын шарлымыжым шижтарыме шотышто оперативный штабын заседанийжым эртарен
Теҥгече Марий Элым вуйлатыше Александр Евстифеев коронавирус инфекцийын шарлымыжым шижтарыме шотышто оперативный штабын заседанийжым эртарен. Правительстве председательын алмаштышыже Илга Дравниеце увертарен: 25-ше мартлан шотлымаште республикыштына коронавирус дене черланыше уке. Тыгак инфекций шарлыме ваштареш ыштыме мера- влак нерген ойлен. Кызыт медицина эскерымаште 649 еҥ шотлалтеш. Нуно йот эллаш миен толшо улыт, куд еҥже- йотэлын гражданинже. 787 шымлымашым эртарыме, чыла лектышыжат отрицательный. Илга Дравниеце тыгак эмлаш мыняр койко кӱлешым шотлымо нерген каласен. Мыняр кӱлешым лишыл жапыште ситарыме лиеш. Ял озанлык министр Алексндр Гречихо республикыште кочкыш да промышленный сатум ситарыме нерген ойлен. Тений январь-февральыште производствын индексше 108 процентыш шуын. Ме шылым шкаланна кӱлеш деч ныл пачаш шукырак ыштен налына. Тидын шотышто нимогай йодышат уке, - манын тудо. Республикым вуйлатыше кугытым иземдыде пашам ышташ, шапашым ешарен шогаш темлен. Тазалыкаралтыш министр деч эмым ситарыме нерген йодын. Вирус да бактерий дене кучедалше препарат- влак кум тылзылан ситыше улыт, - каласен министр. Каҥашыме эше ик пӱсӧ йодыш коронавирус дене кылдалтше шояк уверым шаркалымаш дене кылдалтын. Тыгай уверлан ӱшаныман огыл. Социал сетьыште «Коронавирус. Марий Элын Оперативный штабше» группа пашам ышта. Тушто инфекций нерген пайдале да чын уверым муаш лиеш.
