Эрла Россий печать кече палемдалтеш

           Эрла Россий печать кече палемдалтеш. Тидын вашеш таче республикысе журналист- влакын торжественный погынымашышт эртен. Регионысо Кучем кодшо ийын лектышыже почеш эн сай журналист- влакым рашемден. Марий Элым вуйлатыше кӱкшӧ награде- влакым кучыктымо деч ончыч погынышо- влакым профессионал пайрем дене саламле да у деч у сеҥымаш- влакым ьтыланен. Республикым вуйлатышын премийже- «Шӧртньӧ пером» эн сай журналист пашалан мемнан «Марий Эл» ГТРК-ан корреспондентше да вӱдышыжӧ Константин Микрюковлан кучыктымо. Правительствын «Марий Элым социал-экономик велым вияҥмыжым эн сайын ончыктымылан» премийже- влакым куд номинацийыште кучыктымо. Экономикым вияҥдымым эн сайын ончыктымылан «Марий Эл» газет гыч Юрий Исаков палемдалтын, Ял озанлыкым эн сайын ончыктымылан мемнан ГТРК-н автор коллективше премийым налын, социал сферым да мер тӱҥалтыш нерген эҥ оҥайын каласкалымылан Куженерысе «Заря» газетым палемдыме, тӱвыра илышым ончыктымаште «МЭТР» телеканалын автор коллективше ойыртемалтын, республикыште илыше калык- влакын калыкле ойыртемышт нерген каласкалымылан «Кугарня» газетлан премийым пуымо, йоча да самырык- влакын проблемышт нерген эн сайын возымылан «Марийская правда» газет гыч Екатерина Дьяковам палемдыме.
             Фото: Марий Элым вуйлатышын  администрацийжын увер дене пашам ыштыше пӧлкаже.