Йошкар-Олаште кӱкшӧ технологиян рӱдер лиеш

                     Йошкар-Олаште печатный платым ямдылыме да лукмо шотышто кӱкшӧ технологиян рӱдер лиеш. Тудым Марий Кугыжаныш университет ден «Технотех» завод почаш шонат. Тиде кечылаште проект дене Москошто электрон компонент, модуль да комплектующий- влакым ончыктышо «ЭкспоЭлектроника» Тӱнямбал выставкыште палымым ыштат. Тыгай плата ятыр приборышто кучылталтеш, йодмаш кажне ийын кугем толеш, но ыштен лукшыжо элыштына пеш шагал. Российыште чынлык шотышто 6-шо классан платым ныл предприятий гына луктеш. Нунын кокла гыч иктыже- Йошкар-Оласе «Технотех» завод. Кодшо ийын кеҥежым тудо МарГУ дене специалист- влакым ямдылыме шотышто ойпидышым кылденыт. Туныктышо- влак урокым предприятийыштак эртарен кертыт, студент- влак туштак стажировкым эртат. Кызыт тиде проектым Российысе электрон промышленностьлан кадрым ямдылыме перечньыш пуртымо,- увертара вузын ректоржо.
Фото:  nero-contract.ru