17 07 2019 Поро эр, Марий Эл [слушать]
Тенийсе кеҥеж, шонем, ятыр еҥлан шуко жаплан шарнымашеш кодеш. Поснак, тыге каласаш лиеш кызыт Йошкар-Олаште эртыше Инвалид-влакын Кумшо Всероссийский кеҥеж спартакиадышке ушнышо спортсмен-влак нерген. Тиде таҥасымашыште Марий кундем гыч 51 спортсмен шке вийжым терга, сеҥымаш-влакат куандарат. Теве, мутлан, самырык дзюдоист Юлия Ожигановам шӧртньӧ медаль дене палемденыт. Удыр начарын ужшо-влаклан Савинысе школ интернатыште 10-шо классым тунем пытарен. Дзюдо дене тудым паралимпийский резерв адаптивный спортшколын тренерже, Марий Эл Республикын сулло тренерже Дмитрий Лебедев ямдыла. Тудын дене икмыняр мутым вашталтышым. Тыгак передачына эртыме жапыште ме Оршанке район Чирки ялышке миен савырнена. Рашрак ойлаш гын, верысе книгагудышко. Тудын вуйлатышыже марий шӱлышан, кидпашалан уста самырык специалист Ольга Суслова дене палыме лийына.